ராகுலின் தங்கையாக இருப்பதற்கு பெருமைப்படுகிறேன்: பிரியங்கா புகழாரம்

புதுடில்லி, ஜூன் 6- நாடாளுமன்ற தேர்தலில் காங்கிரஸ் கட்சி வென்ற தொகுதிகளின் எண்ணிக்கை அதிகரித்துள்ளது. இந்நிலையில், காங்கிரஸ் மேனாள் தலைவரும், தன் அண்ணனுமான ராகுல் காந்திக்கு பாராட்டு தெரிவித்து காங்கிரஸ் பொதுச்செயலாளர் பிரியங்கா தனது ‘எக்ஸ்’ வலைத்தளத்தில் வெளியிட்டுள்ள பதிவில் கூறியிருப்பதாவது:-

நீ (ராகுல்காந்தி) எழுந்து நிற்கிறாய். அவர்கள் என்ன சொன்னாலும், உனக்கு என்ன செய்தாலும் நீ பின்வாங்கியது இல்லை. உனது உறுதிப்பாட்டை அவர்கள் எவ்வளவு சந்தேகித்தாலும், உனது நம்பிக்கையை நீ நிறுத்தியது இல்லை. அவர்கள் எவ்வளவு பொய் பிரச்சாரம் செய்தபோதிலும், உண்மைக்கான போராட்டத்தை நீ நிறுத்தியது இல்லை.

அவர்கள் உனக்கு தினந்தோறும் கோபத்தையும், வெறுப்பையும் பரிசாக அளிக்கிறார்கள். இருப்பினும் கோபமும், வெறுப்புணர்வும் உன்னை மிஞ்ச நீ அனுமதித்தது இல்லை. இதயத்தில் அன்பு, உண்மை, கருணை ஆகியவற்றை கொண்டு நீ போராடி வருகிறாய். நீ அனைவரையும்விட துணிச்சலானவர் என்று எங்களுக்கு தெரியும். சகோதரா, ராகுல்காந்தி… உனது தங்கையாக இருப்பதற்கு பெருமைப்படுகிறேன். – இவ்வாறு அவர் கூறியுள்ளார்.