தைத் திங்கள் தமிழர் திருநாள் பொங்கல் சிறப்பிதழ்

பொங்குக உள்ளமெல்லாம் – இல்லமெல்லாம்!
கவிஞர் கலி.பூங்குன்றன்

தை முதல் நாள் பொங்கலே
தமிழர் இல்ல மெல்லாம் பொங்குகவே!

தமிழர்க்குரிய புத்தாண்டு நீ
தை தை யென்று ஆடிநீ வருகவே!

சங்கராந்தி என்று சொல்லி – நம்
சரித்திரத்தை மாற்றுவார் தம்
சரிதத்தை முடித்து வைத்து
சர்க்கரைப் பொங்கலிடுவோம் வா!

உழுதுண்டு வாழும் உழைப்பாளர் நாம்
உழைப்பின் அறுவடையைத் துய்ப்போம் வா!

பயிரிடுதலைப் பாவமென்பவர்
பச்சரிசி பொங்கி கொழுத்திடுவார்!

பாட்டாளி மக்கள் உழைக்காமல்
பச்சரியும் கிடைத்திடுமோ சொல்!

எத்தனைக் காலம் ஏமாற்றுவார்
ஏறு தழுவிய வீரத் தமிழ்மண்ணில்!
ஈரோட்டுச் சூரியன் உதித்த பின்
எடுபடுமோ எத்தர்க் கூட்டத்தின் இருளும் தான்?

எங்கும் ஒலிக்கட்டும் பொங்கலோ பொங்கல்!
மழலைகளின் மத்தாப்புச் சிரிப்பும் கேட்கட்டும்

பண்பாட்டுப் படையெடுப்பின்
முதுகுத் தோலை உரித்திடுவோம்!

பத்தாம் பசலி பழைமைக் காட்டை
பகுத்தறிவுத் தீமூட்டி எரித்திடுவோம்!

நாம் திராவிடர் என்னும் – இன
நரம்புப் புடைத்துக் கொண்டாடுவோம்!

தை முதல் நாள் பொங்கலே
‘தை’, ‘தை’ யென்று ஆடிப்பாடி வருகவே!

அடுத்தாண்டு பொங்கல் பொன்னாளில்
ஆட்சி மாற்ற தேனாறு பெருகவே!

பொங்கலோ பொங்கல்!
புத்தாண்டு வாழ்த்துகள்!