புதுச்சேரி பெரியார் பெருந்தொண்டர் ஜி.கே.எம். என்று அன்பால் அழைக்கப்படும் கிருஷ்ணமூர்த்தி மறைந்தாரே!

 கழகத் தலைவர் இரங்கல்

புதுச்சேரி திராவிடர் கழகத்தின் காப்பாளரும், கழகப் பணிகளுக்காக தாராள மனத்துடன் நன் கொடைகளை வழங்கி வந்த வள்ளலும், இயக்க ஏடுகளுக்குச் சந்தா அளிப் பதிலும், சேர்த்து அளிப் பதிலும்  சளையாத ஆர்வ லரும், இயக்க நிகழ்ச்சிகளில் எல்லாம் நீக்கமறக் கலந்து கொள்பவருமான முதுபெரும் பெரியார் பெருந் தொண்டர் ஜி.கே.எம். என்று ஊர் மக்களால் அன்போடும், மதிப்போடும் அழைக்கப்படுபவரான மானமிகு  கோ.கிருஷ்ணமூர்த்தி அவர்கள் (வயது 90) நேற்று (15.2.2023) மறைவுற்றார் என்பதை அறிவிக்கப் பெரிதும் வருந்துகிறோம்.

புதுச்சேரி சென்றபோதெல்லாம் அவரை நான் சந்தித்து நலம் விசாரிக்காமல் திரும்புவதில்லை - அன்பின் கொள்கலன் அவர்!

அவர் மறைவு புதுவை மாநில திராவிடர் கழகத்திற்கு மிகப் பெரிய இழப்பாகும்.

அவர் பிரிவால் பெருந்துயரத்திற்கு ஆளாகி இருக்கும் அவர்தம் பெருங் குடும்பத்தாருக்கும், உற்றார் உறவினர்களுக்கும், இயக்கத் தோழர்களுக்கும் கழகத்தின் சார்பில் ஆழ்ந்த இரங்கலையும், ஆறுதலையும் தெரிவித்துக் கொள்கிறோம்.

கழகப் பொதுச் செயலாளர் துரை. சந்திரசேகரன், புதுவை மாநிலக் கழகத் தலைவர் சிவ. வீரமணி ஆகியோர் தலைமையில் கழகத் தோழர்கள் இறுதி மரியாதை செலுத்துவார்கள். முதுபெரும் பெரியார் பெருந்தொண்டர் ஜி.கே.எம். அவர்களுக்கு வீர வணக்கம்! 

                                                                                                                                        கி.வீரமணி

சென்னை                                                                                                                   தலைவர், 

16.2.2023                                                                                                   திராவிடர் கழகம்