சிறுபான்மை இனத்திற்கு எதிரான வெறியாட்டம் கூலித்தொழிலாளிகளிடம் இழப்பீடு வசூலித்த சாமியார் அரசு

 குடியுரிமைச் சட்டத்திற்கு எதிராக நடந்த போராட்டங்களில் உத்தரப்பிரதேசத்தில் பொதுச்சொத்திற்கு சேதம் விளைவித்தது தொடர்பாக  இழப்பீடு செலுத்தியவர்களில் ரிக்சா இழுப்பவர், குப்பை சேகரிப்பவர், சாக்குமூட்டை தைப்பவர், நடைபாதை வியாபாரிகள், தினசரி கூலி வேலை செய்பவர்களைப் பிடித்து வன்முறையாளர்கள் என்று கூறி வசூலித்துள்ளனர்.

ஒரு ரிக்சாக்காரர், ஒரு சரக்கு வண்டி ஓட்டுபவர், ஒரு பழ வியாபாரி, ஒரு கோழி விற்பனையாளர், ஒரு பால் வியாபாரி, தந்தையின் ஜவுளிக் கடையில் வேலை செய்யும் ஒரு இளைஞன் மற்றும் பள்ளிக்கூடத்தில் இருந்து திரும்பியவர் .மற்றும் வேலை கிடைத்தால் தினக்கூலிவருவாய் ஈட்டும் 8 தொழிலாளர்கள். இவர்களில் மிகவும் குறைந்தவயதுடையவர் 18 மற்றும் மூத்தவருக்கு 70 வயது.

அதிகாரப்பூர்வ பதிவுகளின்படி, இவர்கள் கான்பூர் மாவட்ட நிர்வாகத்திடம் தலா ரூ.13,476 செலுத்தினர்.  டிசம்பர் 21, 2019 அன்று பெக்கங்கஞ்சில் நடந்த குடியுரிமை சட்ட எதிர்ப்புப் போராட்டத்தின் போது பொதுச் சொத்துக்களுக்கு ஏற்பட்ட சேதத்தில் ரூ.2.83 லட்சத்தை சமமாக செலுத்த உத்தரவிடப்பட்ட 21 பேரில் இவர்களும் அடங்குவர்.

அரசுக்கு சொந்தமான டாடா சுமோ மதிப்பு ரூ.2.5 லட்சம்; இரண்டு கேமராக்கள், மூன்று ஜன்னல்கள் மற்றும் இரண்டு கதவுகளின் மதிப்பு ரூ.33,000 ஆகியவை சேதமடைந்த சொத்துக்கள் என்று நிர்வாகம் கூறியது.

சனிக்கிழமையன்று, லக்னோ மாவட்ட நிர்வாகம்  டிசம்பர் 19, 2019இல் ஹஸ்ரத்கஞ்சில் நடந்த போராட்டத்தின் போது ஏற்பட்ட சேதத்திற்காக 46 பேருக்கு மொத்தம் ரூ.64.37 லட்சம் மீட்பு அறிவிப்புகளை வெளியிட சட்டத்தில் உள்ள சர்ச்சைக்குரிய “கூட்டு மற்றும் பல பொறுப்பு” விதியைப் பயன்படுத்தினர்.

லக்னோவில், குற்றம் சாட்டப்பட்ட அனைவரும் அலகாபாத் உயர் நீதிமன்றத்தில் மேல்முறையீடு செய்ததில் நம்பிக்கை வைத்திருந்தனர். ஆனால் அவர்களுக்கு அலகாபாத் உயர்நீதிமன்றமும் நீதிவழங்கவில்லை.

 21 பேரில் 15 பேரின் குடும்பங்களை உள்ளூர் ஊடகம் ஒன்று கண்டறிந்தது   2.83 லட்சம் மற்றும் அவர்களது பங்கான ரூ.13,476 வந்தது பற்றி கூறும் போது;

ஒரு குடும்பம் தங்களிடம் இருந்த பொருட்களை விற்று தொகையை செலுத்தியதாக கூறினர். மற்ற இரண்டு குடும்பங்கள்  அனைவருமே கூலிவேலைக்குச் சென்று அபராதம் கட்டினோம் என்று கூறினர்.

 மற்ற 12 பேர், நண்பர்கள் அல்லது அண்டை வீட்டாரிடம் கடன் வாங்கியதாகவும், “காவல்துறை தொடர்ந்து அழுத்தம் கொடுத்ததால்” “எப்படியோ செலுத்தி விட்டோம் ” என்றும் கூறினர்.

இந்த வழக்கில் சிறையில் அடைக்கப்பட்ட 15 பேரும் பிணை பெற்றனர். எந்த குடும்பமும் தங்களை அடையாளம் காட்ட தயாராக இல்லை. 15 பேரில் ஏழு பேரின் வழக்குரைஞர்கள் யாரும் மீட்பு அறிவிப்பை நீதிமன்றம் மூலமாக ரத்து செய்யக்கோரவில்லை என்று கூறுகிறார்கள்.

“தாக்கீது அவர்களின் வீடுகளுக்கு வந்தபோது சிலர் சிறையில் இருந்தனர். அவர்களில் சிலர் ஏற்கெனவே தங்கள் சார்பாக பணம் செலுத்திய பிறகு எங்களை அணுகினர். இந்த வழக்கில் நான் கையாளும் அனைத்து வாடிக்கையாளர்களும் ஏழைகள், ”என்று ஒரு வழக்குரைஞர் தனது பெயரை வெளியிடக்கூடாது என்ற நிபந்தனையுடன் கூறினார்.

குற்றஞ்சாட்டப்பட்டவர்களில் ஒருவரான, தினக்கூலி தொழிலாளியிடம், உங்களுக்கு வந்த தாக்கீது குறித்து ஏன் நீதிமன்றம் செல்லவில்லை என்று கேட்டபோது, ​​“நாங்கள் அரசு, நிர்வாகம் மற்றும் காவல்துறையை எதிர்க்க விரும்பவில்லை. எங்களிடம் போதுமான வளங்கள் இல்லை.”என்று கூறினார்.

 போராட்டம் நடந்த இடத்தில் இருந்த 21 பேரில் ஒன்பது பேரை கைது செய்த பின்னர் பெக்கங்கஞ்சில் காவல்துறையினர்  எப்அய்ஆர் பதிவு செய்துள்ளனர், 21 பேருக்கு அப்போதைய கூடுதல் மாவட்ட மாஜிஸ்திரேட் (நகரம்) விவேக் குமார் சிறீவஸ்தவா வழங்கிய அடுத்தடுத்த மீட்பு அறிவிப்புகள் ஒரே மாதிரியானவை.

மூத்த காவல் கண்காணிப்பாளர் (எஸ்எஸ்பி) தாக்கல் செய்த அறிக்கையின் அடிப்படையில், டிசம்பர் 21, 2019 அன்று, நீங்கள் நாசவேலையில் ஈடுபட்டது மற்றும் பொதுச் சொத்துக்களை சேதப்படுத்தியது தெளிவாகிறது. இதற்காக நீங்கள்  ஒன்பது பேர் மற்றும் 1200 அடையாளம் தெரியாத நபர்களுடன் குற்றம் சாட்டப்பட்டுள்ளனர்” என்று குற்றம் சாட்டப்பட்டவர்களில் ஒருவருக்கு ஜனவரி 24, 2020 அன்று தாக்கீது வழங்கப்பட்டது.

“விசாரணையின் போது, ​​உங்கள் குற்றம் பொதுச் சொத்துக்களுக்கு சேதம் விளைவித்தல் தடுப்புச் சட்டம், 1984-இன் கீழ் நடந்தது கண்டறியப்பட்டது. எனவே, ஜனவரி 28, 2020 அன்று நீதிமன்றத்தில் ஆஜராகும்படியும், ஏன் நடவடிக்கை எடுக்கக் கூடாது என்பதை எழுத்துப்பூர்வமாகத் தெரிவிக்கவும் உத்தரவிடப்பட்டுள்ளது. மேலும், பொதுச் சொத்துக்களுக்கு ஏற்பட்ட சேதத்தை நீங்கள் செலுத்த வேண்டும்” என்றும் அந்த தாக்கீதில் குறிப்பிடப்பட்டுள்ளது.

குற்றம் சாட்டப்பட்டவர்களில் ஒருவரான தினசரி கூலித் தொழிலாளியின் வழக்குரைஞர், நிர்வாகம் வழங்கிய ஆதாரங்களை மறுத்து, ஜனவரி 24, 2020 அன்று தாக்கீதுக்கு பதிலளித்ததாகக் கூறினார். “எனது வாடிக்கையாளரின் ஒளிப்படம் என்று நிர்வாகமும் காவல்துறையும் காட்டிய ஒளிப்படம் அவருடையது அல்ல. இது தெளிவான ஒளிப்படம் அல்ல, அது நிச்சயமாக எனது வாடிக்கையாளரின் ஒளிப்படம் அல்ல. நான் அவ்வாறு கூறிய போதிலும், எனது கட்சிக்காரர் இழப்பீடு செலுத்த வேண்டும் என்று உத்தரவு பிறப்பிக்கப்பட்டது,” என்று வழக்குரைஞர் கூறினார்.

மார்ச் 6, 2020 அன்று இந்த வழக்கில் வழங்கப்பட்ட மீட்பு உத்தரவில், அப்போதைய மாஜிஸ்திரேட் கூறியதாவது: “குற்றம் சாட்டப்பட்டவரின் வழக்குரைஞரால் அவர் தாக்கல் செய்த ஆட்சேபனையுடன் எந்த ஆதாரமும் வழங்கப்படவில்லைஞ் எதிர் தரப்பு என்பது மொத்தத்தில் நிரூபிக்கப்பட்டுள்ளது. குற்றம் சாட்டப்பட்டவர் இழப்பீடாக ரூ.13,476 செலுத்துவார் என்றார். அதே போல் குற்றம் சாட்டப்பட்டவருக்கு இழப்பீடு செலுத்த ஏழு நாட்கள் அவகாசம் வழங்கப்பட்டது. அவர் பணம் செலுத்தினார்.

இதுகுறித்து அவரது வழக்குரைஞர் கூறியதாவது: நீதிமன்றம் தாக்கீது அனுப்பியது. என் மூலம் என் வாடிக்கையாளர் பதிலளித்தார். எனது வாடிக்கையாளரின் வாதத்திற்கு பதில் அளிப்பதற்கு பதிலாக, நீதிமன்றம் ஏழு நாட்களுக்குள் பணத்தை கேட்டு உத்தரவு பிறப்பித்தது. நீதிமன்றம்  எப்படி ஒரு உத்தரவை பிறப்பிக்க முடியும்? காவல்துறை சிலரைக் குற்றம் சாட்டியது, நிர்வாகம் அவர்களைக் குற்றவாளிகளாகக் கருதியது.

குற்றம் சாட்டப்பட்டவர்களின் வழக்குரைஞர்கள் மற்றும் குடும்பத்தினரின் குற்றச்சாட்டுகள் குறித்து ​​அப்போதைய மாவட்ட ஆட்சியர் விவேக் சிறீவஸ்தவா கூறியபோது, “இது தேர்தல் நேரம், மற்றும் நான் உங்களுக்கு எந்தக் கருத்தையும் கொடுக்க முடியாது. என்றார். அவர் இப்போது உ.பி.யின் பல்லியா மாவட்டத்தின் தலைமை வருவாய் அதிகாரியாக நியமிக்கப்பட்டுள்ளார்.

இதற்கிடையில், குற்றம் சாட்டப்பட்ட மற்றொருவரின் தந்தை கூறுகையில், “ஒவ்வொரு நாளும் காவல்துறையினர் வந்து எங்கள் வீடு ஏலம் விடப்படும் என்று கூறுவார்கள். பணம் கொடுத்தால் சில காலம் பாதுகாப்பாக இருப்போம் என்றனர். பணத்தைக் கொடுப்பதைத் தவிர எங்களுக்கு வேறு வழி தெரியவில்லை, என்றார்.

15 பேரில் குறைந்தது அய்ந்து பேரின் குடும்பங்கள், குற்றம் சாட்டப்பட்டவர்களை “காவல்துறையினரின் பயம் காரணமாக” இனி வீட்டில் இருக்க வேண்டாம் என்று கூறியுள்ளனர். “எங்கள் மகனை உறவினர்களுடன் தங்கச் சொன்னோம். அவர் இங்கு தங்கினால், அவர் மீது காவல்துறையினர் மேலும் வழக்குப் பதிவு செய்வார்கள் என்று அஞ்சுகிறோம். அவர் காவலர்களின் கண்ணில் படாமல் இருப்பது நல்லது என்று நாங்கள் நினைத்தோம், ”என்று குற்றம் சாட்டப்பட்ட ஒருவரின் தாய் கூறினார்.

எட்டு தினக்கூலிகள் இந்த வழக்கு தங்கள் வாழ்வாதாரத்தை கடுமையாக பாதித்ததாகக் கூறினர். “நான் எனது தினசரி சம்பாத்தியத்தை நம்பியிருந்தேன். நான் சிறையில் இருந்தபோது, ​​பணம் வரவில்லை, நான் விடுதலையானவுடன், ஊரடங்கு அமலானது, வேலை இல்லை. இழப்பீட்டுத் தொகைக்கு அக்கம்பக்கத்தில் உள்ள ஒருவரிடம் கடன் வாங்க வேண்டியிருந்தது. மேலும், நீண்ட காலமாக எங்கள் குழந்தைகளுக்கு உணவளித்தவர்களும் உள்ளனர். நான் எப்படி திருப்பிச் செலுத்துவேன்?என்று அவர்களில் ஒருவர் கூறினார்.

கான்பூரின் மற்றொரு பகுதியைச் சேர்ந்த குற்றம் சாட்டப்பட்ட ஒருவர் இதேபோன்ற வழக்கில், மீட்பு நடவடிக்கைகளுக்கு உயர்நீதிமன்றத்தில் தடை வாங்கியதை அடுத்து, அலகாபாத் உயர் நீதிமன்றத்தில் மனு தாக்கல் செய்ததாக வழக்குரைஞர் ஒருவர் கூறினார்.

“அந்த உத்தரவை மேற்கோள் காட்டி நாங்கள் உயர் நீதிமன்றத்தில் மனு தாக்கல் செய்தோம், ஆனால் ஒவ்வொரு நபருக்கும் தனித்தனி உத்தரவுகளைப் பெற வேண்டும் என்று நீதிமன்றம் கூறியது. மற்றவர்களுக்கும் இதேபோன்ற மனுக்களை தாக்கல் செய்தோம். ஆனால் வழக்கு நிலுவையில் இருந்தபோது, ​​எங்கள் வாடிக்கையாளர்களுக்கு காவலர்கள் தொடர்ந்து மிரட்டியதால் அவர்கள் பணம் செலுத்த வேண்டிய கட்டாயம் ஏற்பட்டது. என்று அந்த வழக்குரைஞர் கூறினார்

 சாமியார் ஆட்சிக்காலத்தில் சிறுபான்மையினர் எந்த அளவு மிரட்டப்பட்டார்கள். அவர்களின் வாழ்வாதாரம் எப்படி சிதைக்கப்பட்டது என்பதற்கு இதுவும் ஒருசான்று ஆகும்.  அடுத்த முறையும் உத்தரப்பிரதேசத்தில் பா.ஜ.க. ஆட்சிக்கு வந்தால், நிலைமை மிகவும் மோசமாகிவிடும்.