தமிழ்நாட்டில் 12 ஆயிரத்திற்கு கீழ் குறைந்த கரோனா பாதிப்பு ...!!

சென்னை, பிப்.4 தமிழ்நாட்டில் கடந்த 24 மணி நேரத்தில் புதிதாக 11,993 பேருக்கு கரோனா பாதிப்பு உறுதி செய்யப்பட்டுள்ளது.

தமிழ்நாட்டில் நேற்றைய (3.2.2022) கரோனா பாதிப்பு குறித்து மருத்துவம் மற்றும் மக்கள் நல்வாழ்வுத்துறை வெளியிட்டுள்ள செய்திக்குறிப்பில் கூறப்பட்டு இருப்பதாவது:-

தமிழ்நாட்டில் நேற்று புதிதாக 1 லட்சத்து 30 ஆயிரத்து 841 பேருக்கு கரோனா பரிசோதனை செய்யப்பட்டது. இதில் 11 ஆயிரத்து 993 பேருக்கு புதிதாக கரோனா உறுதி செய்யப்பட்டுள்ளது.

இதில் அதிகபட்சமாக சென்னையில் 1,751 பேரும், கோவையில் 1,426 பேரும், செங்கல்பட்டில் 1,097 பேரும், திருப்பூரில் 1,017 பேரும், ஈரோட்டில் 689 பேரும் பாதிக்கப்பட்டுள்ளனர்.

தமிழ்நாட்டில் இதுவரை 6 கோடியே 21 லட்சத்து 47 ஆயிரத்து 423 பேருக்கு பரிசோதனை செய்யப்பட்டு, 33 லட்சத்து 87 ஆயிரத்து 322 பேருக்கு தொற்று உறுதி செய்யப்பட்டுள்ளது.

தமிழ்நாட்டில் 1 லட்சத்து 66 ஆயிரத்து 878 பேர் மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.

தமிழ்நாட்டில் 30 பேர் சிகிச்சை பலனின்றி  உயிரிழந்துள்ளனர். இதன்மூலம் தமிழ்நாட்டில் இதுவரை மொத்தம் 37 ஆயிரத்து 666 பேர் கரோனா நோய் தொற்றால் உயிரிழந்து உள்ளனர்.

இத்தொற்று பாதிப்பில் இருந்து  23 ஆயிரத்து 084 பேர் குணமடைந்துள்ளனர். இதுவரையில் 31 லட்சத்து 82 ஆயிரத்து 778 பேர் குணம் அடைந்து உள்ளனர் என்று அதில் தெரிவிக்கப்பட்டுள்ளது.