மாநில அளவில் சாதனை படைத்த பெரியார் மருந்தியல் கல்லூரி மாணவருக்கு பரிசு

திருச்சி, ஆக.13 சாலை மற்றும் போக்குவரத்து பொறியியல் கல்லூரியின் பயின்றோர் சங்கம் கலை, இலக்கியப் போட்டிகளை மாநில அளவில் மண்டலம் வாரியாக நடத்தியது. முதலில் திருச்சி, புதுக்கோட்டை, கரூர், பெரம்பலூர், அரியலூர் ஆகிய மாவட்டங்களுக்கு இடையேயான மண்டல அளவிலான போட்டியில் பெரியார் மருந்தியல் கல்லூரியின் முதுநிலை மருந்தியல் மாணவர்

வே. அருண் நிவாஸ் கவிதைப் போட்டியில் மூன்றாமிடத்தை பெற்றார். அதனைத் தொடர்ந்து ஈரோடு சாலை மற்றும் போக்குவரத்து பொறியியல் கல்லூரியில் 23.02.2020 அன்று தென்னாட்டின் பெர்னாட்ஷா என்ற தலைப்பில் நடைபெற்ற கவிதைப்போட்டியில் மாநில அளவில் இரண்டாமிடம் பெற்ற வே. அருண் நிவாஸ் அவர்களுக்கு  தமிழா மொழி மறவாதே என்ற நிகழ்ச்சியில் ரூ.5000 பரிசுத்தொகையும் உள்நாட்டு விமானச்சுற்றுலாவிற்கான பயணச்சீட்டும் வழங்கப்படவிருந்தது.

கரோனா பரவலைத் தொடர்ந்து நிகழ்ச்சிகளை ஏற்பாடு செய்ய இயலாததால் சாலை மற்றும் போக்குவரத்து பொறியியல் கல்லூரியின் பயின்றோர் சங்கத்தின் சார்பில் திருச்சி அண்ணா பல்கலைக்கழகத்தின் பேராசிரியர் முனைவர் பி. சீதாலட்சுமி மற்றும் பொறியாளர் டி.லோகநாதன் ஆகியோர் பெரியார் மருந்தியல் கல்லூரியின் முதல்வர் முனைவர் இரா. செந்தாமரை அவர்கள் முன்னிலையில் 15.07.2021 அன்று மாணவர் வே. அருண் நிவாஸ் அவர்களுக்கு ரூ.5000-க்கான பரிசுத் தொகையினையும் பாராட்டுச் சான்றிதழையும் வழங்கி சிறப்பித்தனர்.

15000க்கும் மேற்பட்ட போட்டி யாளர்கள், 150 நடுவர்கள் என தமிழர் பண்பாடு, கலாச்சாரம் மற்றும் கலைகளை மீட்டெடுக்கும்  கலைக்களம் என்ற அருமையான இப்போட்டியில்  தமிழ் வளர்ச்சித்துறை மற்றும் உலகத் தமிழாராய்ச்சி நிறுவனத்தின் இயக்குநர் முனைவர் கோ. விசயராகவன், சொல்லின் செல்வர் சிந்தனைக் கவிஞர் கவிதாசன், திரைப்பட புகழ் ஈரோடு மகேஷ், திரையிசைப் புகழ் கலைமாமணி வேல்முருகன் ஆகியோர் சிறப்பு விருந்தினராகவும் நடுவர்களாகவும் கலந்து கொண்டனர் என்பது குறிப்பிடத்தக்கது.